Gebore ine Fasnachtsfamilie isch es als Ching s’gröschte während der Fasnacht mit dä Grosse dörfe am Umzug mit z’laufe. Aber die chline Binggis wärde grösser und plötzlich längt’s ine nümi nume no im Vortrab mit z’laufe.

So isch das au bim Beat (13 Johr alt) und Daniela (10 Johr alt) Nussbaumer gsi. Si hei welle sälber 'aktiv' wärde. Das mit em Pfiffe wäri chli ufwändig gsi, drum het e 'Gugge' ane müesse. Im gerold si Härz het grad afo höcher schlo, het er doch sälber mäng Johr d'Pauke innere Gugge gschlage. Im Septämber 1984 isches denne sowit gsi. E sell ä neui Gugge gä und zwor e Chindergugge.

Schnäll si 16 Chinge im Altersdurchschnitt vo 11 Johr zämme und d'Birsgugger-Clique für d'Fasnacht 1985 agmäldet gsi. Bi dr Suechi nach Instrumänt si d'Chäller durchforschtet worde und au im Lokal vo de Agfrässeni-Clique isch gluegt worde, ob nit no nöime verdruggti oder nüm igsetzti Güggli umeligge. Dr Jö Heizmann het eus die erschte Stückli bibrocht.

Will s'finanzielle Polschter nid riisig isch gsi, het jede e alte Waggis füre gno. Damit mir glich no es einheitlichs Bild abgä hei, si im Chäller vo Nussbaumers 'schnäll' 16 Larve igleit worde und so si mir denne s'erscht mol a d'Fasnacht. I dä erschte Johre hei mir hauptsächlich mit eusem chindliche Charme d'Zueschauer verzauberet. So isch d'Beachtig vo de Zueschauer weniger uf de Musigstückli gläge als vilmeh dodruf, ob die beide Tschninelle würklich mitenand dr glichi Schlag träffe oder nid (was natürlich nid immer klappt het).

Mittlerwile si mir ä Verein mit Statute , si zwüsche 30 und 40 Mitglieder und hei euse Name uf BIRSGUGGER reduziert. D'Drummele vom Ronny het mehrerne Schlagzüg Platz gmacht und au die alte und verbühlte Güggli si durch neui Trompete, Posune, Sousis, Hörner, grossi Paukene und Schlagblöck ersetzt worde. Wo am Afang No wichtig isch gsi, überhaupt e Ton use z'bringe, wird hüt scho fascht profimässig probt und musiziert.

Aber trotzdem isch sit em Afang bi de Birsgugger s'wichtigschte unveränderet blibe. Nämlich gmeinsam chöne Fasnacht mache, Spass ha und de feschti Zämähalt wo d Birsgugger usmache chöne z bewahre.

Uf über 35 Johr chönne mir zwüschezitlich zrugg luege. Hei Fasnachte erläbt mit summerliche Temperature, Schnee, Räge, Stürm (so dass au scho mol Ziegel vo de Dächer vom Stedtli gfloge si). Hei chalt gha, gfrore und au scho gschwitzt wie d'Bäre. Viles het sich i dere Zyt veränderet, aber Öbbis isch immer glich blibe, nämlich d'Freud a dr Fasnacht!

I dene meh als 35 Johr hei mir natürlich vili Gschichte erläbt. Die Einti oder Anderi wärde mir dir sicher emol verzelle...

Daniela Nussbaumer